شكر كبير وطلب بسيط ، اضافة رابط جديد

 

بسم الله الرحمن الرحيم
لما فكرت اني اطلب المساعدة في هالمدونة وان كل البنات يدعموني كان اعتمادي الأول والأخير على معرفتي ” إن كثير من البنات يحبون يساعدون ويقدمون النصيحة اللي يقدرون عليهـا ، وان الخير في امتي إلى قيام الساعة ..”

وهذا الدعااء بسيط لكم عسى ربي يستجيبة لي :
يارب اي انسانه حط لها رد هنا وكتتبه وساعدتني وونبهتني على فكرة تخليني اصلح حياتي يارب ترزقها من واسع فضلك دنيا وآخرة ، ولاتحوجها لاحدمن خلقك وتسخر لها زوج يسعدها وذرية تقر عينها بهـا يارب ياكريم تجبر عثرتها ، وتقضي دينها وتستجيب دعوتها ، وتهديها لخير الدنيا والآخرة ياسميع الدعاء .

كل الردود اللي انكتبت هنا بسطتني ، وخلتني احس بالمسؤولية أكثر ، واحس انه فعلا لازم انجز عشان نفسي اول ، وعشان تجربتي هذي ممكن تكون ملهمة لأخوات غيري يغيرون طريقتهم في الحياة ، ويفكرون بطريقة مختلفة عن اللي تعودوا عليها ، ويستعيدون شخصايتهم اللي ذابت بالمذيبات وكلام الناس وتحطيمهم يعني لما نجي نطور ونغير شي في شخصيتنا ..الرد يكون خير … وش صاير بالدنيا وغيريبة ومن هذا الكلام …

مثلي انا في عمر 28 في الدول الثانية يمكن لسة صغيرة ويادوب تفكر تتزوج .. لكن عندنا هنا مسكينه وبتموت والمفروض تتمنى تكون الرابعة في ذمة رجل معدد ، وتحمد ربها وتبوس يدينها وجهـ وقفا … بعد .. / ونفس الشي للوظايف اللي طلعت بشروط غريبة لايزيد عمرها عن 25 عامـا ( والمشكلة يبغونها بخبره ) طيب تكون يادوب تخرجت ،  لكن الحقيقة ان ممكن هالتجارب المرة اللي مريت فيها من مشاكل عائلية ، وظروف مادية ، وقلة ثقة بالنفس ، وتأخر بزواجي ، وكلام الناس والشماته ، وغيرهـ ” تعطيني النضج والعبرة والدرس اللي تخليني ماعاد اكرر الأخطاء اللي وقعت فيها … واستعيد نفسي …

قصة الهمتني  ، هذة اللي لقيتها في مدونة احجيوج ..

http://miolog.com/success-stories/leo-babauta/

غير اشياء كثيرة في حياته في مدة بسيطة سنين فقط ، لو عندنا كان قالو له لماشاب ودوة الكتاب صح وإلا لا ؟

انا بحط الجدول اللي بمشي عليه ممكن يابنات تساعدوني من خبراتكم في تعديل الجدول واي اقتراحات واي اشياء ممكن ؟

الجدول :)

رابط ثاني للجدول من عرب شير

الطلب ببساطة :

1- تعطوني رايكم في الجدول ، مو تمدحون لا لو في تعديلات اسويها ياليت تقولونها

2- تحملون الجدول وتحاولون تطبقونه قد ماتقدرون كيف اثر وغير في حياتكمـ  ، وتعطوني التعديلات اللي عملتوها استفيد منها ويستفيدون البنات يعني ( مثلا جدول الطالبة غير ، والمتزوجة غير ، والعاملة غير ….بيكون عندنا جداول كثيرة لما تجي اي اخت ماتتعب وهي تختار تلقى بنات قبلها نظموا وقتهم بطريقة حلوة وتاخذ جدول جاهز فية وتعدل فية بشكل بسيط حسب مايناسبها )

3- تنشرون هالمدونه المتواظعة ، لاتفهموني غلط مو عشان تساعدني لا ، يمكن لما انجح تكون ملهمة لغيري ، ونتعلم سوا والفائدة راح تكون للجميع

4- إذا انتي مدونة حطيها في مفضلتك دلي البنات عليها ، مو بس ميمو تعاني كثييييير في سني ( حتى تستحي تقول عمري 27 ، 28 ) تحس انهـ الناس بتنتقصهـا ( ولما نتعاون كلنا اننـا نجدد حياتنا حتى لو بعد 25 ونعطي اكثر بتتغير نظرة الكل ونسوي لو شي بسيط في رفض الفكرة اللي تقول عوانس وكئيبات وإلى آخرة من الخرابيط ) ..

5- احبكم في الله الله لايحرمني منكم

6- اخيرا ادعوا للأخت اللي اخذت منها الجدول ( في بدايته قبل التعديلات اللي عملتها علية واللي ناسبتني ) وهي الأخت  المشرفة هوني في ساحة الأقلاع  جزاهـا الله خير

توضيح :

الجدول هذا مو كـامل 100% لكن حسن حياتي بشكل كبير ( من ناحية الإهتمام بالنفس + والدين )

لوتلاحظون في الجدول في جزء كاتبة فوقة (www) هذا حاولت احط فية افضل مواقع الإنترنت من ضمنها موقع اشرف علية ( على اساس انظم وقتي لكن للأسف مانفعت معاي يمكن ماالتزمت فيها )

شي ثاني ( الجائزة فوق ) ماعرفت كيف اكافئ نفسي لو انجزت حاجة ( من جد مااعرف افرح او ابسط نفسي ) …!

في حاجة حاولت انتبه لها اكثر ( مااضغط على نفسي في الجدول خصوصا في شغلة العبادة لاني كنت اقراء سورة البقرة في قيام الليل ومع الأسف بعض الاحيان مايمدي الوقت فأرهق نفسي بالعبادة وبدون روحانية لحد ماتركتها .. فكرت اني اقرا بعد العشا سورة البقرة ..وبعدين الوتر يكون خفيف في آخر الليل )