ماذا حدث امس ؟
يوم السبت الموافق 13/ربيع الأول ..
كانت البداية الحقيقية ، بعد مرحلة التحضير في الأسبوع الفائت ،
والحمد لله كنت راضية عن يوم امس ( السبت ) لولا بعض الأخفاقات ..
الجميل فية :
عنايتي بنفسي طول اليوم غذائيا وجماليا( بداية من شرب الموية والاكل المتوازن …نهاية بالعناية بالبشرة بافضل الكريمات اللي عندي غسول وموية ورد ومرطب 
يعني لاني كنت نادرا اداوم على شرب الموية لدرجة تجيني الام في الكلى وشحوب الله لايوريكم في الوجهـ ومااشرب لأكثر من يوم لاني طبعا انسى شي اسمة موية وللأسف هذا له اضرار صحية كبيرة ( من الأسبوع الماضي ) وانا بديت اداوم على اشياء صحية كثيرة تساعد على تحسن صحتي وعنايتي فيهـا والشي الثاني تحسن بشرتي اللي اهم شي عندي انهـا تتحسن …
الحلو الثاني : رجعت نفسيتي ( متفائلة ) جدا والحمد لله واحاول بشى الطرق اني ابحث لي عن مصدر رزق طبعا انا كانت عندي افكار كثيرة بس مع الأسف من الأحباط والضيق كنت كل يوم ااجل الافكار والعمل عليها ،
لكن مع امس اختلف الموضوع ، قررت اني افرغ نفسي لهذا الموضوع في الصباح بحكم الهدوء والكل راح للمدراس وعملت لي شي اشبة بمكتب عشان كل الأشياء تكون موجودة جنبي ( اللاب توب ، التلفون ، الجوال ، الفاكس ) حتى ارسل السيرة الذاتية لأمة محمد كلهم ..
طبعا ( فكرة اني اعمل مشروع واخذ عليه دعم من صندوق المئوية ) من زمااااان في بالي بس الله يقطع التسويف ، البارح اتصلت عليهم وطبعا انصدمت من هالأتصال انهم مايدعمون فكرة المشروع اللي في بالي ( وهو غير تقليدي ) ابدا لكن مع الأسف مايدعمون المشاريع اللي فيها استيراد وتصدير لصعوبة استخراج التصاريح ، عندي فكرة مشروع ثاني بس قلت راح استخير اول قبل مااراسلهم بالفكرة ( ان شاء الله مااطول في الأستخارة ) يارب … !
لكن هذا مو معناه ان مشروعي السابق فاشل او غيرهـ لا بالعكس انا ( واثقة جدا من نجاحة ) بس ينقصني التمويل اللي هو اهم شي بصراحة وإذا توفر لي التمويل ماني معبرة احد وبسويه بإذن الله … بعض الأشياء مايكون احد مؤمن فيهـا إلا احنـا ..
في وسط اليوم ( ركعتين الضحى ) كانت اجمـل شي يحسسني بقرب رب العالمين مني دعواتكم اني مااقطعهـا ابدا لانها فعلا خفيفة دايمـا …
طيب الشي المهم اش اللي تعلمتهـ :
تعلمت امس بعد قرائتي لدورة العمر الجديد لناعمه الهاشمي ، وهي بالمناسبة دورة مجانية بحط رابطهـا في اخر الموضوع ( هدية مني لكمـ … يعني عشاني جبت الرابط )* المهم اش اتعلمت ( اني فعلا اعمل الشي الصح وماافكر وش راح تقول عني الناس
يعني ؟
طبع فيني مااحب ازعل احد ، ودي لو مااكسر بخاطر احد وللأسف دايم الاقي تفسيرات خطا لتصرفاني ( قلاب النية في راسه 70 جنية ) هذا المثل المعروف للناس اللي تحب تسوي ذكا وتفكر في الامور على كيفهـا .. وتفسيرها تفسيرات غريبة عجيبة تخليني اطلع في النهاية انا الغلطانهـ اللي حصل اني كنت ناوية اروح لقرابة لي من مدة مارحت لهم ” نفسيتي كانت متضايقة وهم مع الأسف مايشجعون بلعكس دايم يزيدون ضيقي بضيق اكبر اقصد ناس فيهم تشاؤوم لو جيت بحاول يحطموني .. وهذا الموضوع اثر على نفسيتي كثير استشرت اخصائية نفسي قال إذا حسيتي فعلا ان الإكتئاب بدل ينتقل لك حاولي تخففين علاقتك بهم اريح لك ولهمـ .. مع اني والله العظيم احبهم لكن الموضوع اكبر من طاقتي …
بعد الشرح هذا : لاني كنت ناوية اروح لهم بعد المغرب صلة واطمئنان على قريبة لي صار لها حادث خفيف والحمد لله وهي بخير ماقدرت لاني نمت لما صحيت اول شي في بالي جا وش بيقولون ومن هالكلام وقعدت اكل بنفسي ، وكنت ناوية اتصل لكن زي ماقلوكم يبدا الشيطان يوسوس اكيد بيقولون كذا وكذا ومن هالكلام …وكنت في اخر لحظة راح اتراجع عن فكرة اني اتصل ، وإذا مااتصلت ومارحت لمجرد اني خايفة من كلامهم كذا انا الخسرانهـ وبكون متنازلة عن صلة الرحم لاجل اشياء ممكن تكون حقيقة وممكن وهم …
الحمد لله اتصلت واطمئنيت عليهم وبالرغم من انه المكالمة كان فيهـا بعض من التلميحات فانا راضية على اللي سويتهـ لانه الصح حتى لو فكروا ، اللي يفكرون بكيفهم انا علي بنفسي ولا راح اطب في حفرة التبريرات ، لان اللي حاطه في بالهـا شي خلاص عمرهـا ماراح تغيرهـ
اتعلمت كمـان حاجة مهمه :
وهذا بعد من دورة الأستاذة ناعمة الهاشمي ، اذا بحل مشاكلي لازم احاول ابدا باي مشكلة مو شرط كلها في وقت واحد والتشبيه اللي حطته حلو يعني فهمني اكثر وقرب لي الصورة بشكل جميل قالت إذا تشابكت سلاسل الحلي ( العقود والحلق والأساور دايما تتشابك ) كيف تفكين من بعض راح تمسكين طرف سلسله وتتبعين هذا الطرف لحد ماتحلينهـا كلهـا كذا بكل بساطة … بس تعرفون بعض الأحيان نحس الأمور كلها ملخبطة ومخربطة وضاعت من يدينا عشان كذا مابنقدر نفكر ابدا ابدا ً …
في شي ثاني اتعلمته بس الأسبوع اللي فات مو امس :
- دايما كنت احس اني قبيحة سوا بطول شعري او بقصرة وبمعنى اصح ماكنت مكتشفة مكامن الجمال في شوشتي العزيزة غير اسبها واطفش من تمشيطهـا اتعلمت اني استشور شعري وفيه ( استشوار صح زي الكوفيرات ) وبعدهـا مكرته بالبنس ، طلع حلو ماشاء الله لاقوة إلا بالله حتى الصبغة اللي كنت طفشانه منها لان شكلها مو حلو طلعت مع شعري الممكر بشكل مرة حلو الحمد لله هي حاجة بسيطة لكنهـا مهمة بالنسبة ليهـ …
وفي الأخير انجزت امور كنت مأجلتها وقت طويل :
اتصلت على دكتور التقويم حتى اكمله والحمد لله جامن سوريا وقاعد لين الأربعـاء + اتصالي بعد اللطيف جميل والمئوية برضوا اخذت فكرة مو زي اول على عمايا
بدال مااكون على النت بفضاوة ( كنت اقلب في مواقع انجليزية تجارية على اساس ) اجيب بضاعة وابيعهـا .. طبعا في اكثرمن موقع بس ان شاء الله نتفق انا وصديقتي عليها شريكتي في مشروع المستقبل …
انا سعيدة ( واعتقد السعادة مطلب مهم وماهي بحاجة مال اوجاه انا سعيدة لاني قاعدة اتحرك واعمل حاجة مو بس مفعول بهـ ؟!
يهمني رايكم من كل قلبي
ماشاء الله عليك .. اهنيك على اصرارك وعزيمتك ..
حلو الواحد يعزم على تغيير ذاته ، وحلو انك تثبتين لنفسك انك قول وفعل
قو آهيد
يا حبي لك
مررررة انبسطت لك لأنه فعلاً هذا المهم إنك تبدأ تتحرك وربي ما يضيع تعب أحد ..
الله يوفقك ويحقق لك اللي ببالك وأحسن ..